އޭގެ ފަހުން ޑިޕްލޮމާ ޙާޞިލުކުރެއްވުމަށްފަހު، އަލުން ރައީސުލްޖުމްހޫރިއްޔާގެ އޮފީހާ ގުޅިވަޑައިގެންނެވީ 2022 ވަނަ އަހަރު ޕަބްލިކް ރިލޭޝަންސް އޮފިސަރ (ޓްރެއިނީ) އެއްގެ ގޮތުގައެވެ. އެއަށްފަހު 2004 ވަނަ އަހަރުން ފެށިގެން އެސިސްޓަންޓް ޕަބްލިކް ރިލޭޝަންސް އޮފިސަރގެ މަޤާމުގައި އަހަރަކަށްވުރެ ގިނަ ދުވަހު މަސައްކަތްކުރައްވާފައިވެއެވެ.
ޤާނޫނީ ދާއިރާއިން މަތީ ތަޢުލީމް ޙާޞިލުކުރެއްވުމަށްފަހު، ކުރު މުއްދަތަކަށް އަލުން ރައީސުލްޖުމްހޫރިއްޔާގެ އޮފީހާ ގުޅިވަޑައިގަތުމަށްފަހު، 7 ޖުލައި 2009 އިން ފެށިގެން އަލްއުސްތާޛު އަޙްމަދު އުޝާމް މަސައްކަތްކުރައްވާފައިވަނީ ބަންޑާރަނައިބުގެ އޮފީހުގައެވެ. އެގޮތުން، ބަންޑާރަނައިބުގެ އޮފީހުގެ އެކި ޤާނޫނީ މަޤާމްތަކުގައި 10 (ދިހައެއް) އަހަރަށް ވުރެ ގިނަ ދުވަހު އަލްއުސްތާޛް އަޙްމަދު އުޝާމް ޚިދުމަތް ކުރައްވާފައިވާއިރު، އޭގެ ތެރެއިން ޑެޕިއުޓީ ސޮލިސިޓަރ ޖެނެރަލް އަދި ޑެޕިއުޓީ އެޓަރނީ ޖެނެރަލްގެ މަޤާމު ހިމެނެއެވެ. 

އަލްއުސްތާޛު އަޙްމަދު އުޝާމް، ބަންޑާރަނައިބުގެ އޮފީހުގައި މަސައްކަތްކުރެއްވި މުއްދަތުގައި ދައުލަތަށް ކޮށްދެއްވާފައިވާ ފާހަގަކުރެވޭ ޚިދުމަތްތަކުގެ ތެރޭގައި، ދައުލަތުގެ ފަރާތުން ދަޢުވާކުރާ އަދި ދަޢުވާލިބޭ އެންމެހައި ދުސްތޫރީ އަދި މަދަނީ މައްސަލަތަކުގައި ދިވެހިރާއްޖޭގެ ހުރިހާ މަރުޙަލާއެއްގެ ކޯޓުތަކުގައި ދައުލަތް ތަމްސީލްކުރެވުމާއި، ދައުލަތް ހިމެނޭ ކަންކަމުގައި ސަރުކާރުގެ އިދާރާތަކަށް ދޭންޖެހޭ ޤާނޫނީ ލަފާ ދިނުމާއި، ސަރުކާރުގެ ސިޔާސަތުތައް ތަންފީޛުކުރުމަށްޓަކައި ޤާނޫނީ ގޮތުން ކުރަންޖެހޭ މަސައްކަތްތައް ކުރެއްވުމާއި، ބައިނަލްއަޤްވާމީ އާބިޓްރޭޝަންތަކާއި އެހެނިހެން މައްސަލަތަކުގައި ދިވެހިރާއްޖެ ތަމްސީލްކުރުން ހިމެނެއެވެ. އެގޮތުން ޖީ.އެމް.އާރ. – އެމް.އޭ.އެޗް.ބީ. ކޮންސޯޓިއަމް އަދި ޖީ.އެމް.އައި.އޭ.އެލް. އާބިޓްރޭޝަން މައްސަލައާއި، ނެކްސްބިޒް ލިމިޓެޑް އާބިޓްރޭޝަން މައްސަލައާއި، ނޫމަޑި ރިސޯޓްސް އެންޑް ރެސިޑެންސީ އޭޖީ އާބިޓްރޭޝަން މައްސަލައިގައި، އަލްއުސްތާޛް އަޙްމަދު އުޝާމް ދިވެހި ސަރުކާރު ތަމްޞީލުކުރައްވާފައިވާކަން ފާހަގަކުރެވެއެވެ. 

އަދި ހަމައެއާއެކު، އޮފީހުގެ ހިންގުމުގެ ދާއިރާއަށް ބަލާއިރު، ބަންޑާރަނައިބުގެ ލަފަޔާއެކު، އޮފީހުގައި މަސައްކަތްކުރައްވާ ޤާނޫނީ ވަކީލުންނަށް އިރުޝާދު ދެއްވައި، އޮފީހުގެ ސިވިލް ލިޓިގޭޝަން އެންޑް ޑިސްޕިއުޓް ރިސޮލިއުޝަން ޑިވިޜަނާއި، ލީގަލް އެފެއާޒް ޑިވިޜަންގެ އެންމެހައި މަސައްކަތްތައް ހިންގަވައި ބަލަހައްޓަވައި، ޑެޕިއުޓީ އެޓަރނީ ޖެނެރަލްގެ ހައިސިއްޔަތުން ސަރުކާރުން ބަންޑާރަނައިބާ ޙަވާލުކުރައްވައި އެންމެހައި މަސައްކަތްތަކުގައި ޤާނޫނީ ލަފަޔާއި އިރުޝާދު ބަންޑާރަނައިބަށް ފޯރުކޮށްދެއްވައި، މުޅި އޮފީހުގެ ހިންގުމުގައި އިސް ދައުރެއް އަދާކުރައްވާފައިވާކަން ފާހަގަކުރެވެއެވެ. 

ދައުލަތުގެ ބަންޑާރަނައިބުގެ މަޤާމާ ޙަވާލުވެވަޑައިގަތުމުގެ ކުރިން، އަލްއުސްތާޛު އަޙްމަދު އުޝާމް ވަނީ 19 ވަނަ ރައްޔިތުންގެ މަޖިލީހުގައި ވިލިމާލެ ދާއިރާގެ މެންބަރުކަން ކުރައްވާފައެވެ. އެގޮތުން 28 މެއި 2019 އިން 17 ނޮވެންބަރ 2023 އަށް ރައްޔިތުންގެ މަޖިލީހުގެ މެންބަރެއްގެ ހައިސިއްޔަތުން، އަލްއުސްތާޛު އަޙްމަދު އުޝާމް ވަނީ އެކި ޤާނޫނީ މައްސަލަތަކުގައި ރައްޔިތުންގެ އަޑު މަޖިލީހުގައި އިއްވަވައި، ޤާނޫނުތައް އިޞްލާޙުކުރުމަށް ބިލު ހުށަހަޅުއްވައި، މަޖިލީހުގެ ތަޅުމުގައި ކުއްލި މައްސަލަތައް ހުށަހެޅުއްވައި، ސަރުކާރު ޖަވާބުދާރީކުރުވުމަށްޓަކައި އެކި މިނިސްޓަރުންނާއި ސުވާލުކުރައްވައި، 19 ވަނަ ރައްޔިތުންގެ މަޖިލީހުގެ 9 ކޮމެޓީއެއްގައި ޢަމަލީގޮތުން މަސައްކަތްކުރައްވާފައެވެ. 

އަލްއުސްތާޛު އަޙްމަދު އުޝާމް އަކީ ބަންޑާރަނައިބުގެ މަޤާމުގެ ހައިސިއްޔަތުން ޖުޑީޝަލް ސަރވިސް ކޮމިޝަންގެ މެންބަރުކަން އަދި ކްލެމެންސީ ބޯޑުގެ ރައީސްކަންވެސް ކުރައްވަމުން ގެންދަވާ ފަރާތެކެވެ.